Estado de execución

O Proxecto de Lei Orgánica do Sistema Universitario (PLOSU), aprobado polo Consello de Ministros o 21 de xuño de 2022, publicouse no Boletín Oficial das Cortes Xerais (BOCG) o 1 de xullo de 2022. Rexeitadas pola Cámara as emendas á totalidade de devolución, presentadas polo Grupo Parlamentario Popular no Congreso, o Grupo Parlamentario VOX e o Grupo Plural (Junts per Catalunya), na sesión celebrada o 22 de setembro, o PLOSU continúa a súa tramitación na Comisión de Ciencia, Innovación e niversidades. Os días 21, 22 e 28 de setembro esta Comisión celebrou comparecencias de expertos/as en relación coa norma. O prazo para presentar emendas parciais concluíu o 13 de outubro, e a previsión é que a Comisión constitúa o Relatorio lexislativo que estudará o Proxecto e as emendas o próximo 27 de outubro. Presentado o Informe do Relatorio, a Comisión poderá celebrar sesións para o debate, votación e aprobación do Ditame. Dado que se trata dunha norma de carácter orgánico, a Comisión carece de competencia lexislativa plena, e o seu Ditame deberá debaterse e votarse en Pleno, así como as emendas que se manteñan vivas. A previsión é que ese Pleno puidese celebrarse antes de concluído o presente período de sesións do Congreso (setembro-decembro) para, en caso de ser aprobado, remitirse ao Senado para continuar a súa tramitación a partir do seguinte período de sesións que inicia en febreiro.