Estado de execución

A Lei 4/2019, do 17 de xullo, de administración dixital de Galicia, regula o Cartafol cidadán da Xunta de Galicia, e defínea como o conxunto estruturado de información e documentos en formato electrónico relativo ás relacións administrativas de cada persoa interesada, xerada nas súas relacións administrativas comúns co sector público autonómico de Galicia. A norma incide no carácter transversal do Cartafol cidadán, que é única para o conxunto de órganos e entidades do sector público autonómico de Galicia.

Durante o ano 2022 incorporouse ao cartafol cidadán información procedente de 407  procedementos.

Durante o ano 2023 incorporouse ao cartafol cidadán información procedente de 474 procedementos.

Ademais, o 13 de decembro do 2023 púxose a disposición da cidadanía a aplicación XuntaEu, que é a aplicación móbil que dá acceso aos principais servizos de administración dixital da Xunta de Galicia. Esta aplicación posibilita, entre outros servizos, xestionar o usuario de Chave365 (cambiar a clave de acceso, renovala, modificar o teléfono móbil ou darse de baixa), consultar expedientes e presentacións como na sede electrónica da Xunta, consultar as notificacións electrónicas, ter a disposición os apoderamentos outorgados ou recibidos a través do Rexistro Electrónico Xeneral de Apoderamentos de Galicia, comprobar a validez dos documentos asinados electronicamente (CVE), así como consultar os certificados e ter acceso aos cartóns ou carnés emitidos pola Xunta de Galicia. Así mesmo, permite consultar e modificar os datos persoais que constan no cartafol cidadán, recibir avisos personalizados, e coñecer as citas solicitadas para as oficinas de atención á cidadanía e de rexistro ou coas consellerías.